إلى صاحبة الديوان

يا ستنا الطاهره
يا بنْت فاطِمَة الزهرا
بابات ساهره
عشان ادعي
واصلّي عالنبي جدك
حبيب قلبي وحبيب قلبك
صلاة ربي وتسليمه
عدد ماشاء
وملو الأرض والسماوات

يا ست الناس
هاكون دايما على عهدك
وهاحفر قبري بايديا وانام زيك
واصبّر روحي وانا صابره
لعلي اكون
في مرة نسيت
فريضة من فروض الصبر
فاعوّضْها
ولما اقوم ابوس كفيني وش وضهر
واردّد وِرْد انا نَدْراه
كل ما هاصحى بعد الموت


يا رب الحمد حمْدانَه
واه من شوقي سكرانه
ونفسي اطوف
بأرض ما طافوا أسيادي
واسبّح وابكي وانادي
مدد يا رب نجيني
من الدنيا وفتنتها
وناسها وكاسها والشهوات
وسَفَه البَتّ في المبتوت

اااه
باخاف من الموت
وباشتاقله
وباحتاجله
تراب كل اللي سبقوني
بريحة الروح..
مَرة ريحان
ومَرة يارب عافينا
رحيم رحمن..
محكّم رحمته فينا
..
تَجلِّي مديحي ما يكفّي
ونِفْسي يا نَفْسِي تتزكِي
بمعراج نور
واكون صافية بلون الحور
واكون الوان كما الياقوت

على ابواب التكايا احباب
أحبوا الله..فحببهم في لمّتهم
وسببهم يكونوا لبعضهم اسباب
باكون بينهم..باعلي بالنشيد الصوت
واطهر قلبي مالدنيا
ودناوتها
واعوذ بالله من الطاغوت
وأزوّد روحي بالتقوى
دي نعم الزاد
ونعم القوت
باكون واثقة بنصر الله
كيونس إذ خرج مالحوت
باكون بينهم..وربي معاي
باكون وحدي..وربي معاي
وخلوة ربي ما أعظم
وما أحلاه من ملهم
محرر قلبي من غيره
وكافي نفسي من خيره
ورافع روحي بمشيئته
بحق السر في الآيات
وحق الذات
وحق المُلك في الملكوت
!!