اسمحلي اقول

اسمحلي اقول
ان الجمال
كل الجمال
..في بحور عنيك
وفي نظرتك
الشايلة هم الكون بحاله
بس برضو مش بتنسى
ان قلبي عنده هم
انه دايما
محتاج اليك

آه..اسمحلي اقول
محتاج اليك؟
محتاج اليك..محتاج اليك..محتاج اليك
وباحلف ان ضحكتك
هي الحياه
لأنها ..رغم انها
مش بالتفاهة اللي في شفايف البشر
بس برضو
مش بتنسى
ان قلبي نفسه يفرح..بين ايديك

اسمحلي اقول
بين ايديك
مليون وطن
بس الجمال اللي فيهم كلهم
هو انهم
بيعشقوا نفس الوطن
وانا قلبي ايه غير حتتين
حته شايلة حبي ليك
وحته شايلة حبي ليه

اه..اسمحلي اقول
حبي ليه
من غير زعل
ولا تغير؟
باقولك ايه..
انا عارفة انك عاشقه زيي
و اني حتى
لو دبت فيه
او مت فيه
عارفة انك مش هاتزعل
وعشان كده..انا دايبة فيك

اه..اسمحلي اقول دايبة فيك
اسبابها ايه
روحك سكن
قلبك مفيش زيه كتير
ولا في الدفا ولا في الحنان
والجمال فيه انه عارف
ان قلبي زيو برضو
وعشان كده قلبي هاويك

اسمحلي اقول
قلبي هاويك
كده قد ايه؟
قد الحنان..قد الجمال..
قد الهوى اللي اتهوي
من يوم ماحسوا بالهوى
قد الغرام..قد الهيام..
قد الوجع..وقد العذاب
واسمحلي اقول..
واقول واقول
وافضل اقول